विद्युतको माग कम हुँदा बिजुली खेर

काठमाडौ । दशैंमा विद्युतको माग कम हुँदा बिजुली खेर गएको छ । दसैको बिदाका कारण विभिन्न कलकारखाना, व्यापारीक मल र संस्थाहरु बन्द रहेका कारण बिजुली खेर गइरहेको नेपाल विद्युत प्राधिकरणका निमित्त कार्यकारी निर्देशक लेखनाथ कोइरालाले जानकारी दिए । उनले नेपालमा अहिले केहि समयका लागि दैनिक करिब २ सय मेगावाटसम्म खेर गइरहेको बताए । खेर गइरहेको विद्युतको खपतबारे प्राधिकरणसँग तत्कालै खपत बढाउने कुनै विकल्प नरहेपनि दीर्घकालिन रुपमा रणनीति तयार पारेर अगाडि बढिने उनको भनाई छ । प्राधिकरणले खेर गइरहेको विद्युतको खपत गर्न सिँचाई, कृषि उत्पादन, विद्युतीय सवारीका लागि विद्युत उपलब्ध गराउने, उपभोक्तालाई इन्डक्सन चुल्हो प्रयोगलाई प्रोत्साहन गर्ने जानकारी दिए ।

कार्यकारी निर्देशक कोइरालाले अहिले नेपालमै उत्पादन भएको विद्युतले खपत गर्न पुगिरहेकाले भारतबाट आयात गर्नुपर्ने अवस्था नरहेको बताए । बिहान र बेलुकाको पिक समयमा भने अधिकतम् रुपमा नेपालबाट उत्पादित सबै बिजुली उपयोग हुने गरेको उनको भनाई छ । अहिले वर्षा रोकिएर नदीहरुमा पानी संग्लिएपछि रातको समयमा खेर फाल्नुपर्ने बिजुलीको परिमाण थप बढेको प्राधिकरणको भनाई छ ।

तपाईको प्रतिक्रिया

Techie