भारतमा कोरोना भाइरसबाट संक्रमितको संख्या दिनहुँ बढ्दै

भारतमा कोरोना भाइरसबाट संक्रमितको संख्या दिनहुँ बढ्दो क्रममा देखिएको छ । भारतको स्वास्थ्य मन्त्रालयका अनुसार पछिल्लो २४ घण्टामा नौ सय ४१ जना नयाँ संक्रमित थपिएका छन । योसँगै भारतमा संक्रमितको संख्या १२ हजार ७ सय ५९ पुगेको छ । कोरोना भाइरस संक्रमणका कारण भारतमा चार सय २० को मृत्यु भइसकेको छ । पछिल्लो २४ घन्टामा ३७ जनाको मृत्यु भएको छ । १ सय ८३ जना उपचारपछि घर फर्केका छन । भारतमा अहिलेसम्म २ लाख ९० हजारको नमूना संकलन गरिएको छ । त्यस्तै पाँच लाख आरडिटी टेस्ट पनि गरिएको छ । भारतमा देशभर ट्रेन, बस, रेल र अन्य यातायातका साधनमा प्रतिबन्ध कायमै छ । शिक्षण संस्था, सपिङ मल, जिम क्लबलगायत सबै सेवा बन्द छन । लकडाउन कायमै भए पनि संक्रमण फैलदो क्रममा रहेको छ । राजधानी दिल्ली र आर्थिक राजधानी मुम्बईसहित भारतका छवटा ठूला सहरलाई कोरोना भाइरस महामारीको खतरनाक क्षेत्रमा राखिएको छ । दिल्ली र मुम्बईबाहेक चेन्नई, बैंगलोर, कोलकाता र हैदराबाद पनि खतरनाक क्षेत्रमा परेका छन । भारतमा आगामी केही साता निकै सङ्कटपूर्ण हुने विज्ञले चेतावनी दिएका छन ।

तपाईको प्रतिक्रिया

Techie