चीनमा भेटियो महामारी ल्याउन सक्ने अर्को नयाँ भाइरस

एजेन्सी : चीनको वुहान शहरबाट फैलिएको कोरोना भाइरस (कोभिड-१९) संक्रमणका कारण विश्व नै आक्रान्त बनेको छ । कोरोना महामारी अन्त्य नहुँदै फेरी चीनमा नै अर्को किसिमको नयाँ फ्लु देखा परेको छ ।

वैज्ञानिकहरूले चीनमा अर्को महामारी ल्याउन सक्ने सम्भावना बोकेको फ्लुको नयाँ स्ट्रेन पत्ता लगाएका हुन् । यो फ्लु हालै मात्र सुँगुरमा भेटिएको हो । यसले मानिसलाई संक्रमित गर्न सक्ने वैज्ञानिकहरूको भनाइ छ ।

फ्लुको स्ट्रेनले थप रूप परिवर्तन गरेर मानिसमा सर्दै गई महाव्याधि बन्न सक्ने भनी अनुसन्धाताहरूले चिन्ता व्यक्त गरेका छन् । तत्कालका लागि यो समस्या नभए पनि यसले मानवलाई संक्रमण गर्न सक्ने गरी अनुकूलन हुने सबै लक्षण देखाएको र यसलाई निकै कडा निगरानी गर्नुपर्ने उनीहरूको भनाइ छ ।

यो बिल्कुलै नयाँ स्ट्रेन भएकाले मानिसमा यसप्रति इम्युनिटी छैन । अनुसन्धाकर्ता वैज्ञानिकहरूले प्रोसीडिङ्स अफ द नेसनल एकेडेमी अप सायन्सेजमा एक लेख लेखेर सुँगुरमा भाइरस नियन्त्रण गर्ने उपाय अपनाउने तथा सुँगुर व्यवसायीहरूमाथि कडा निगरानी राख्ने काम तत्कालै अवलम्बन गर्नुपर्ने सिफारिश गरेका छन् ।

तपाईको प्रतिक्रिया

Techie